सिमरा प्रहरीको सफलता बिस्फोट गराउने,फिरौती माग्ने चार जना पक्राउ

बारा २६ मन्सिर :
बाराका उद्योगी र व्यपारीलाई धम्की दिनुका साथै बम विस्फोट गराइ फिरौती रकम माग्ने गिरोहका चार जनालाई प्रहरीले पक्राउ गरेको छ। पक्राउ पर्नेहरूमा बाराको परवानिपुर गाँउपालिका-४ का ३१ वर्षीय प्रमोद साह गोढ, २० वर्षीय देवशंकरराम,बाराकैजीतपुरसिमरा उपमहानगरपालिका-२० का २० वर्षीय अच्छेलाल गोसाई र बाराकै फेटा गाँउपालिका-३ का ३९ वर्षीय दिपेन्द्रकुमार धानुक रहेको बारा प्रहरिले जनाएको छ ।चारै जनाले बाराको परवानिपुर गाउँपालिका-४ एमएस इँट्टा उद्योगका संचालक मनोजप्रसाद साह तेलीसँग ३ महिना पहिले फिरौती बापत १५ लाख रुपैयाँ मागेका थिए। तेलीले रकम दिन अस्वीकार गरेपछि गत कात्तिक ४ गते तेलीको इँट्टा उद्योगमा बम विष्फोट गर्नुका साथै फिरौती रकम नदिए ज्यान मार्ने धम्की दिएका थिए।
बुधवार इँट्टा उद्योगी तेलीलाई ३ लाख फिरौती लिएर बाराको परवानिपुर-४ चैनपुरमा बोलाएको बेला इलाका प्रहरी कार्यालय सिमराबाट प्रहरी नायब उपरीक्षक गोबिन्द पुरिको कमान्डमा सहायक निरीक्षक सागर राणा सहित खटिएको प्रहरी टोलीले चारै जनालाई पक्राउ गरेको भयो ।
पक्राउ परेका चारै जनाको गिरोहले बाराकै प्रसौनी गाउँपालिका ४ बस्ने नन्दकिशोरप्रसाद कुम्हाललाई पनि मोबाइलबाट धम्की दिइ ५० लाख रुपैयाँ फिरौती मागेका थिए। फिरौती रकम नदिएपछि असोज १० गते राती कुम्हालको घर छेउमा सुतली बम विष्फोट गराएका थिए।
बाराकै परवानिपुर गाउँपालिका ४ स्थित नारायणी आयल रिफाइनरीका सञ्चालकलाई पनि फिरौतीका लागि फोन गरी धम्की दिएका थिए। फिरौती रकम नपाएपछि असोज २ गते उद्योग छेउमा सुतली बम विष्फोट गरी तर्साएर २५ हजार रुपैयाँ लिएका थिए।
पक्राउ परेका चारैजनालाई हिरासतमा राखी अनुसन्धान भैरहेको प्रहरी उपरीक्षक खनालले जानकारी दिनु भयो ।