एमाले नेता एंव अर्थशास्त्री थापाको निधन

नेकपा (एमाले) का नेता एंव अर्थशास्त्री डाक्टर गोविन्दबहादुर थापाको कोरोना संक्रमणका कारण निधन भएको छ ।
डाक्टर थापाको बाँसबारीस्थित गंगालाल राष्ट्रिय हृदयरोग केन्द्रमा उपचारका क्रममा मंगलबार बिहान साढे ६ बजेको समयमा निधन भएको हो। कोरोना संक्रमण देखिएपछि एक महिनाअघि अस्पताल भर्ना गरीएका थापालाई पछिल्लो १५ दिनदेखि भेन्टिलेटरमा राखिएको थियो।

थापा एमालेको अर्थ तथा योजना विभाग सचिव जिम्मेवारीमा हुनुहुन्थ्यो।

राष्ट्र बैंकका पूर्वकार्यकारी निर्देशक थापा मनमोहन अधिकारी नेतृत्वको ९ महिने अल्पमत सरकारकाे अर्थमन्त्री भरतमोहन अधिकारीका आर्थिक सल्लाहकार रहनुभएको थियो।

थापाले एसियाली विकास बैंकको मनिलास्थित कार्यालयमा आवासीय प्रतिनिधिका रूपमा समेत काम गरीसक्नुभएको थियो । थापा पछिल्लो समय थापा भरतमोहन अधिकारी स्मृति प्रतिष्ठानमार्फत सामाजिक कार्यमा आवद्धता थियो । कास्कीका स्थायी बासिन्दा उहाँ अहिले बसुन्धरामा बस्दै आइरहनुभएको थियो। डा.थापाका श्रीमती, एक छोरा र एक छोरी छन् ।