परीक्षा प्रणालीमा देखिएको समस्या सुधार्न अनेरास्ववियुको माग

नेकपा एमाले समर्थित विद्यार्थी संगठन अखिल नेपाल स्वतन्त्र विद्यार्थी युनियनले परीक्षा प्रणालीमा देखिएको समस्यालाई रोक्न त्रिभुवन विश्वविद्यालय परीक्षा नियन्त्रकलाई आग्रह गर्दै मागपत्र बुझाएको छ ।

ज्ञापनपत्रमा विभिन्न १० माग समावेश गरिएका छन् । अनेरास्ववियुका अध्यक्ष सुनिता बरालद्वारा हस्ताक्षरित मागपत्रमा प्रश्नपत्र निर्माणमा देखिएको विकृति र लापरवाहीलाई रोक्न विज्ञलाई जवाफदेही बनाउने गरी प्रणालीगत सुधार गर्नुका साथै प्रश्न बैङ्कलाई वैज्ञानिक बनाउन माग गरिएको छ ।

पछिल्ला समयमा त्रिविका विभिन्न तह र विषयका प्रश्नपत्र निर्माणमा निकै त्रुटि देखिँदै आएको छ । प्रश्नपत्र निर्माणमा देखिएको गैरजिम्मेवार कार्यप्रति त्रिवि त्यति जिम्मेवार देखिएको पाइएको छैन । त्रुटि गर्ने प्रश्नपत्र निर्माणकर्ताको नामसमेत सार्वजनिक गरिएको छैन भने आँशिक रूपमा अध्यापन गर्नेहरूलाई प्रश्नपत्र निर्माणमा प्रयोग गरिएको पाइएको छ ।

अनेरास्ववियुले अनुशासन भङ्ग गर्ने परीक्षाकेन्द्र, मिलेमतो गर्ने शिक्षक तथा कर्मचारीको अध्ययन गरी प्रतिवेदन गरी सार्वजनिक गर्न माग गरेको छ ।

त्रिविले निर्धारण गरेका परीक्षा केन्द्र सम्भव भएसम्म विद्यार्थीलाई पायक पर्ने र एउटै सवारी साधनको प्रयोगबाट पुग्न सकिने स्थानमा निर्धारण गर्न माग गरिएको छ ।

परीक्षा सम्पन्न भई १२० दिन पूरा भइसकेका सबै तहका परीक्षाको परीक्षाफल ४५ दिनभित्र सार्वजनिक गर्न माग गर्दै सबै तहका सबै परीक्षाको परीक्षाफल बढीमा तीन महिनाभित्र प्रकाशित गर्न माग गरिएको छ ।

पनिकाले सञ्चालन गर्दै आएको प्राइभेट परीक्षाका कार्यक्रम हाल विनाविकल्प बन्द गरिएकाले सो तत्काल खुला गर्न पनि अनेरास्ववियुले माग गरेको छ ।                                                 –  पेश गरिएको माग पत्र –

श्रीमान् परीक्षा नियन्त्रकज्यू
परीक्षा नियन्त्रण कार्यालय
त्रि.वि बल्खु काठमाण्डौँ

विषय : माग पत्र पेस गरेको बारे ।
नेपाली विद्यार्थी आन्दोलनको मूल प्रवाह, शैक्षिक आन्दोलनको नेता सङ्गठन अनेरास्ववियुले हरेक क्षेत्रका विकृति र विसङ्गतिका विरुद्ध आवाज बुलन्द गर्दै आएको सर्वविदितैै छ । शैक्षिक क्षेत्रमा देखिएका विकृति, विसङ्गतिको अन्त्यका लागि साथै शैक्षिक सुधारका सृजनात्मक कदमका पक्षमा दृढतापूर्वक लागि परेका इतिहास पनि दोहो¥याइ रहनु पर्दैन । हामी “सुखी नेपाली समृद्ध नेपाल” को राष्ट्रिय आकाङ्क्षा गुणस्तरीय शिक्षाबाट मात्रै सम्भव हुन्छ भन्नेमा पूर्ण विश्वस्त छौँ । विडम्बना आज नेपालको शैक्षिक क्षेत्र माफिया र दलालहरूको रङ्गमञ्च बन्दै गएको छ, सार्वजनिक शिक्षालाई खुइलाएर, निजीकरणलाई पोस्न सरकारी मुखुण्डो ओडेर, निजी स्वार्थको सुँड घुसाउने सुलसुले हात्तीहरूबाट त्रि.वि.लाई बचाउनु पर्ने आजको आवश्यकता हो । त्यस्तै राजनीतिक दलगत छद्म छाताभित्र छिपेर, राज्यसत्ताको आँडमा विश्वविद्यालयलाई अनन्तकालीन तालाबन्दीको दुश्चक्रमा फसाँउने र अन्ततः सार्वजनिक विश्वविद्यालयलाई विघटन गरी निजी क्षेत्रलाई पोस्ने हर्कतहरू पनि दिनानुदिन बढेका छन् । यसैगरी त्रि.वि. परीक्षा नियन्त्रण कार्यालय बल्खु पनि दलाल, माफिया र अप्राज्ञिक व्यक्तिहरूको बदनियतपूर्ण कार्यहरूबाट घेरिँदै गएको विगतका केही घटनाहरूले पुष्टि गर्दछ । वर्षौँ अगाडिका समस्याहरू जहाँको त्यही छन् । यस्तो अवस्थामा यी यावत् षड्यन्त्रको जालोलाई तोड्दै विश्वविद्यालयलाई Center of Excellence बनाउन र विश्वविद्यालयलाई युगानुकूल रूपान्तरण गरी विद्यार्थीहरूलाई विश्वशनीय र गुणस्तरीय सेवा प्रवाह गर्न त्रि.वि. परीक्षा नियन्त्रक समक्ष अनेरास्ववियु निम्नलिखितका मागहरू पेस गर्दछ । यो माग पत्र पेस गर्नका लागि मात्र होइन, कार्यान्वयनका लागि हो त्यसैले यी मागहरू गम्भीरतापूर्वक पूरा गर्न अनेरास्ववियु जोडदार माग गर्दछ । यी मागहरूलाई वेवास्ता गरी गैरजिम्मेवार बनेमा एउटा जिम्मेवार सङ्गठनको नाताले अनेरास्ववियुले जस्तोसुकै कदम चाल्न पनि पछि नपर्ने कुराको चेतावनी दिन चाहन्छौँ ।
हाम्रा मागहरू
1. प्रश्नपत्र निर्माणमा देखिएको विकृति र लापरवाहीलाई रोक्न विज्ञलाई जवाफदेही बनाउने गरी प्रणालीगत सुधार गरियोस् साथै प्रश्न बैँकलाई वैज्ञानिक बनाइयोस् ।
2. अनुशासन भङ्ग गर्ने परीक्षाकेन्द्र, मिलेमतो गर्ने शिक्षक, कर्मचारीहरूको अध्ययन गरी प्रतिवेदन तयार गरी सार्वजनिक गरियोस् । साथै त्रि.वि.ले निर्धारण गरेका परीक्षा केन्द्रहरू सम्भव भएसम्म विद्यार्थीलाई पायक पर्ने र एउटै सवारी साधनको प्रयोगबाट पुग्न सकिने स्थानमा निर्धारण गरियोस् ।
3. प्रत्येक जिल्लाभित्रको परीक्षा केन्द्र सम्बन्धित जिल्लाभित्रै परीक्षा सञ्चालन गर्ने गरी व्यवस्था गरियोस् ।
4. विद्यार्थीहरूलाई सजिलो हुनेगरी यस कार्यालयबाट प्रदान गरिने सेवालाई विस्तृत रूपमा उल्लेख गरी एक हप्ताभित्र नागरिक बडापत्र तयार पारी उपयुक्त ठाउँमा प्रस्ट रूपमा देखिने गरी राखियोस् ।
5. परीक्षा दिएर १२० दिन पूरा भैसकेका सबै तहका परीक्षाको परीक्षाफल ४५ दिन भित्रमा प्रकाशित गरियोस् साथै सबै तहका सबै परीक्षाको परीक्षाफल बढीमा तीन महिनाभित्रमा प्रकाशित गरियोस् ।
6. आवश्यक कागजातसहित प्रक्रिया पूरा भएका विद्यार्थीहरूको प्रमाणपत्र २४ घण्टाभित्र दिने व्यवस्था गरियोस् ।
7.विविध कारणवश निर्धारित शैक्षिक वर्ष भित्र तह पुरा गर्न नपाएका विद्यार्थीहरूलाई समयसमयमा मौका परीक्षाको व्यवस्था गरियोस् ।
8. प.नि.का ले उपलब्ध गराउने सबै सेवाहरूलाई इलष्लिभ बाट पनि सुचारु गरियोस् ।
9. प.नि.का ले सञ्चालन गर्दै आएको प्राइभेट परीक्षा कार्यक्रमहरू हाल विनाविकल्प बन्द गरिएकोले हजारौं बिद्यार्थीहरू काम गर्दै स्वअध्ययन गर्ने अधिकारबाट बञ्चित भएकोले निश्चित आधार तयार गरी तुरुन्त खुल्ला गरियोस् ।
10. २४ सै घण्टा विद्यार्थीका गुनासा र समस्या सुन्न र सम्बोधन गर्न १५ दिनभित्र हटलाईन सेवाको व्यवस्था गरियोस् ।
हार्दिक अभिवादन सहित !
बोधार्थ
उपकुलपतिको कार्यालय, त्रि.वि., कीर्तिपुर ।
शिक्षाध्यक्षको कार्यालय, त्रि.वि., कीर्तिपुर ।
रजिस्ट्रारको कार्यालय, त्रि.वि, कीर्तिपुर ।
प्राज्ञिक परिषद्को कार्यालय, त्रि.वि., कीर्तिपुर ।

……………………….
सुनिता बराल
अध्यक्ष