सिमराका दुई वटा सहकारीमा एकैरात चोरी, जीतपुरसिमराका सहकारी असुरक्षित बन्दै, प्रहरीको सुरक्षा फितलो हुदै

माघ १२, सिमराः बाराको सिमरामा बिहीवार राती दुई वटा सहकारी संस्थामा एकैपटक चोरी भएको छ । जीतपुरसिमरा २ स्थित सिमरा महिला बचत तथा ऋण सहकारी संस्था र जनकल्याण मध्यवर्ती बचत तथा ऋण सहकारी संस्थामा चोरी भएको हो ।

करिब दुई सय मिटरको दुरीमा रहेका दुवै सहकारीमा भएको घटना हेर्दा एउटै व्यक्ति वा समुहले चोरी गरेको हुन सक्ने आशंका गरिएको छ । सिमरा महिला साकोसको ताला फुटाएर कार्यालयभित्र प्रवेश गरेका चोरले रकम फेला नपारेपछि सिसि क्यामराको हार्डडिक्स चोरेर लगेका छन् । दुवै सहकारी संस्थाबाट सिसि क्यामराको रेकर्डिङ सुरक्षित रहने हार्डडिक्स चोरी भएको छ ।

झ्यालको ग्रिल निकालेर भित्र पसेका चोरले जनकल्याण सहकारीमा पैसा राख्ने भल्ट र दराजहरु फुटाएका छन् भने कागजात यत्रतत्र फालेका छन् । भल्टमा पैसा नभएपनि  दराजमा करिव ४ हजार नगद रहेको र सो पैसा सहित चोरले क्यामराको हार्डडिक्स चोरेर लगेका हुन् ।

यता सिमरा महिला सहकारीमा भएको चोरीको प्रकृति उस्तै छ । चेन गेटको ताला फुटाएर भित्र पसेका चोरले पैसा नभेटेपछि क्यामराको हार्डडिक्स चोरी गरेका हुन् ।

सिमरा महिला सहकारीमा चोरी भएको यो दोस्रो पटक हो । यसअघि २०७९ साउन १२ गते उक्त सहकारी संस्थामा पहिलो पटक चोरी भएको थियो । सो समयमा पनि सिसि क्यामराको हार्डडिक्स लगिएको थियो ।

जीतपुरसिमरामा पछिल्लो समय सहकारी र वित्तिय संस्थामा चोरी हुने क्रम बढेको छ । यसअघि मनहर्वाका दुई वटा सहकारी संस्थाबाट लाखौं रकम चोरी भएको थियो । जीतपुरसिमरा १८ मनहर्वास्थित साना किसान कृषी सहकारी संस्थाबाट २०७९ असार १९ गते १२ लाख ७४ हजार रुपैया चोरी भएको थियो ।

यसैगरी मनहर्वामै रहेको मौवादेवी बचत तथा ऋण सहकारी संस्थामा गत असोज र कार्तिकमा दुई पटक चोरी भयो । असोज २८ गते तीन लाख १७ हजार र कार्तिक २१ गते १३ हजार रुपैया चोरी भएको थियो ।

यस्तै जीतपुरसिमरा १८ स्थित उचिडिमा रहेको फरवार्ड माइक्रोफाइनान्स लघुवित्त वित्तिय संस्थामा मंसिर ३ गते ताला फोडेर प्रिन्टर र हार्डडिक्स चोरी गरिएको थियो । यता जीतपुरसिमरा १५ डुमरवानामा गत मंसिर ९ गते राती एटिएम मेसिन फोडेर रकम चोरीको प्रयास भएको थियो ।

जीतपुरसिमरा उपमहानगरपालीकामा भएका सहकारी र बित्तिय संस्थामा भएका चोरीका घटनाले यहा रहेका सहकारीहरू असुरक्षित बन्दै गईरहेका छन् । देशभर नै सहकारीमा समस्या देखिएको बेला जीतपुरसिमरामा रहेका सहकारीमा चोरीका घटना समेत बढ्नुले आम मानिसको सहकारी प्रतिको विश्वस्नियतामा कमि आउन सक्ने सहकारी क्षेत्रका अगुवाहरूनै वताउन थालेका छन् । पटक पटक यस्ता घटना भए पनि प्रहरी प्रशासनले चोर समाउन नसक्दा प्रहरीको सुरक्षा व्यवस्था प्रति नै चुनौती देखिएको छ । आम नागरिकको जनधनको सुरक्षा गर्नुपर्ने प्रहरीले घटना रोक्न नसकेको, घटनाका दोषी पत्ता लगाउन नसक्नु, समयमा प्रहरी घटनास्थलमा नआउनुले यहाका नागरीकले असुरक्षित महसुस गर्न थालेको स्थानियले बताए ।