सङ्घीय निजामती विधेयकमाथि छलफल सुरु

सङ्घीय निजामती विधेयकमाथिको छलफललले तीव्रता पाएको छ । सङ्घीय ऐन अभावमा भइरहेको अनेक जटिलतालाई दृष्टिगत गरी सन्सदको राज्य व्यवस्था तथा सुशासन समितिले केही दिनयता सो विधेयकका संशोधनकर्ता सान्सदहरूसँग संघीय मामिला तथा सामान्य प्रशासन मन्त्री राजकुमार गुप्ता र सचिवको उपस्थितिमा पालैपालो सैद्धान्तिक छलफल गरिरहेको छ ।

आजको छलफलमा सान्सदहरू अमनलाल मोदी, किरण कुमार साह, कुसुमदेवी थापा, गंगा कार्की, अमर बहादुर थापा, विमला सुवेदी, छिरिङ डम्पु लामा भोटे,जीवन परियार, शिशिर खनाल, दिनेश यादव, पूर्णबहादुर घर्ती, शान्ति श्रेष्ठ, रमा कोईराला, रणेन्द्र बराइली, राजेन्द्र कुमार केसी, लक्ष्मी तिवारी, लेखनाथ दाहाल,सिता कुमारी राना, सरस्वती बजिमाया,सपना राजभण्डारी, सिता मिजार, सोविता गौतम, हेमराज राई र ज्ञानु बस्नेतले भाग लिनु भएको थियो ।

उहाँहरुले ऐनको नाम फेर्नुपर्ने, दलगत ट्रेड युनियन खारेज गरेर राष्ट्रिय ट्रेड युनियन बनाउनुपर्ने, कर्मचारीमाथि राजनीतिक हस्तक्षेप नगरी जिम्मेवार बनाउँदै गल्ती गर्नेलाई दण्डको व्यवस्था गर्नुपर्ने, कर्मचारी सरुवामा चक्रीय प्रणाली लागू गरी तोकिएको ठाउँमा खटिनैपर्ने नखटिए निलम्बन र बर्खास्तसम्मको व्यवस्था गर्नुपर्ने, तीन तहमा कर्मचारीको व्यवस्थापन गर्नुपर्ने, गोल्ड मेडलिस्टलाई सेवा प्रवेशमा सहुलियत प्रदान गर्नुपर्ने, एक पटक भन्दा बढी आरक्षणको सुविधा उपभोग गर्न नपाइने, दुर्गममा जाने कर्मचारीलाई प्रोत्साहन गरिनुपर्ने, महिलालाई विदामा विशेष व्यवस्था र ‘राइट टू फ्यामिली’लाई ध्यान दिनुपर्ने, पाँच वर्षको ‘कुलइन पिरियड’पछि मात्रै कर्मचारीले चुनाव लड्न पाउनेलगायत कयौँ सुझाव दिनुएको थियो ।
छलफलको क्रममा आएका सुझावहरूलाई सङ्घीय मामिला तथा सामान्य प्रशासनमन्त्री राजकुमार गुप्ताले सकारात्मक रूपमा लिएको बताउनु भयो । छलफलकाक्रममा आएका महत्वपूर्ण सुझाबहरूलाई समेटेर अगाडि बढ्ने समेत उहाँको भनाइ थियो। साथै मन्त्री गुप्ताले छलफलमा सहभागी हुनुभएका सांसदहरूलाई धन्यवाद समेत दिनु भयो ।