राजावादीको भण्डाफोर गर्न एमालेको देशव्यापी जागरण र्‍याली

काठमाडौं १८ चैत्र :
सत्तारुढ दल नेकपा एमालेले राजतन्त्रवादीको भण्डाफोर र गणतन्त्रको पक्षमा जागरण सन्देश दिन देशव्यापी जागरण र्‍याली गरेको छ ।

देशभरका जिल्ला सदरमुकाम र प्रमुख सहरहरूमा गणतन्त्रका पक्षमा जागरणसभा र मोटरसाइकल र्‍याली गरिएकाे हो ।

एमालेले काठमाडौं उपत्यकाको हकमा संयुक्त रूपमा मोटरसाइकल र्‍याली गरेको महासचिव शंकर पोखरेलले बताए ।

लोकतान्त्रिक गणतन्त्र सरकारको मात्र सरोकारको विषय नभई जनताको बलिदानीपूर्ण संघर्षको उपलब्धि पनि भएकाले त्यसको रक्षाको लागि एमालेले कार्यक्रम गरेको उनको भनाइ छ ।

राजावादीको सक्रियता बढेपछि त्यसको प्रतिवाद गर्न एमालेले देशव्यापी अभियानको घोषणा यसअघि नै गरेको थियो । त्यही घोषणाअनुसार आज र्‍याली गरेको हो । एमालेले मात्रै नभई गणतन्त्र पक्षधर अन्य दलहरूले पनि राजावादीको जनआन्दोलनलाई प्रतिवाद गर्न देशव्यापी रूपमा आन्दोलन अगाडि बढाइरहेको छ ।
राजावादीहरूले शुक्रबार गरेको आन्दोलन तोडफोड र लुटपाटमा केन्द्रित भएपछि अहिले चर्को विवादमा फसेको छ । तीनकुने घटनाको मुख्य जिम्मेवार पूर्वराजा ज्ञानेन्द्र शाह नै भएको ठहर गर्दै मुख्य राजनीतिक दलहरूले कारबाहीको चेतावनी दिइरहेका छन् ।
एमालेले आज गरेको जागरण अभियानको लागि १० नारा तय गरेको छ । जसअनुसार हत्या, हिंसा लुटपाट बन्द गरे, जन्मसिद्ध अधिकार अस्वीकार गरौं, दास र रैती बन्न मञ्जुर छैन, हत्यारालाई कारबाही गर, शान्ति सुरक्षा कायम गर, सामाजिक अराजकता अन्त्य गर लगायतका नारा रहेका छन् ।

राजधानीमा आयोजना गरेको रयालिमा नेकपा एमालेका महासचिव शंकर पोखरेल सम्बोधन गरेका थिए भने अन्य जिल्ला हरूमा केन्द्रीय स्तरका नेताहरुले सम्बोधन गरेका छन्।