गणतन्त्रको बिकल्प गणतन्त्र नै हुन्छ – एमाले पोलिटब्युरो सदस्य पौडेल

बारा १० चैत्र :
नेकपा एमालेको ३ महिना वडा केन्द्रित अभियान अन्तर्गत बारा प्रदेश सभा क्षेत्र नम्बर ४( ख )को बैठक आज परवानीपुरमा सम्पन्न भएको छ।

एमाले पोलिटब्युरो सदस्य तथा पूर्वमन्त्री पुरुषोत्तम पौडेलको प्रमुख आतिथ्यतामा सम्पन्न बैठकले वडा केन्द्रित अभियानलाई व्यापक बनाउने निर्णय गरेको छ। त्यसैगरी बैठकले भोलि चैत ११ गते सबै वडामा गणतन्त्रको पक्षमा जनसचेतना कार्यक्रम गर्ने निर्णय समेत गरेको छ। कार्यक्रममा बोल्दै प्रमुख अतिथि पौडेलले गणतन्त्रको विकल्प गणतन्त्र नै हुने बताउनुभयो । उहाँले २४० वर्षको राजतन्त्रले अशिक्षा, बेरोजगारी र जनतामा पीडा मात्र दिएको उल्लेख गर्दै गणतन्त्रको सुन्दर पक्ष जनताका छोराछोरी प्रतिनिधि हुने व्यवस्था भएकोले गणतन्त्रको विकल्प गणतन्त्र मात्रै हुने स्पष्ट पार्नुभयो। राजतन्त्र अब चिहानमा गइसक्यो राजतन्त्र फर्केर आउने अवस्था छैन केही कमी कमजोरी छन् भने सुधार गरेर जान सक्नुपर्छ उहाँको भनाइ थियो।

कार्यक्रममा पोलिटब्युरो सदस्य तथा बारा इन्चार्ज ज्वाला साहले गणतन्त्रमा जनताका सबै समस्याहरू पूरा हुने भएकोले मुठ्ठी भर व्यक्तिले आफ्नो स्वार्थ पूरा गर्न व्यवस्थाको विरोध गरेको दाबी गर्नुभयो।

कार्यक्रममा एमाले मधेस प्रदेश कमिटी सचिव मनोज पौडेल जनताको पक्षमा एमालेले मात्र काम गरेको उल्लेख गर्दै एमालेका विरुद्धमा चौतर्फी घेराबन्दी भएको हुनाले त्यो घेराबन्दीलाई तोडेर अगाडि बढ्न कार्यकर्तालाई आग्रह गर्नुभयो।

कार्यक्रममा प्रदेश कमिटी सदस्यहरु मोबिन आलम, उमेश गुप्ता, सुनिल पाल, क्षेत्रीय संयोजक ध्रुव यादव, परसौनिका गाउँपालिका अध्यक्ष विनोद जयस्वाल, परवानीपुर अध्यक्ष राम क्षेत्री पटेललगायतले बोल्नुभएको थियो। प्रदेश सभा क्षेत्र नम्बर ४ ख का संयोजक अशेश्वयर गुप्ताको अध्यक्षतामा सम्पन्न बैठकको सहजीकरण सचिब गजेन्द्र पटेलले गर्नुभएको थियो।