जसपाको ५१ मध्ये ३४जना यादवको पक्षमा,आधिकारिकता यादवले पाउने र ठाकुरले गुमाउने निश्चित

काठमाडौं ११ श्रावण :
जनता समाजवादी पार्टी नेपालमा अध्यक्ष उपेन्द्र यादव पक्षले आधिकारिकता पाउने करिब निश्चित भएको छ। निर्वाचन आयोगले तत्कालीन राष्ट्रिय जनता पार्टी नेपाल र संघीय समाजवादी पार्टी नेपालबीच एकता हुँदा हस्ताक्षर गरेका ५१ जना कार्यकारिणी समिति सदस्यको ‘हेड काउन्ट’ गरिरहँदा यादव पक्षले आधिकारिकता पाउने करिब निश्चित भएको हो।

आयोग स्रोतका अनुसार अहिलेसम्म यादवको पक्षमा ३४ जना कार्यकारिणी समिति सदस्यले हस्ताक्षर गरिसकेका छन्। यो भनेको झण्डै दुईतिहाइ हो।

जसपामा रहेका ५१ जना कार्यकारिणी सदस्यमध्येमा यसअघि यादव पक्षमा ३३ जना रहेको बताइएको थियो। तर आज आयोगमा यादवको पक्षमा ३४ जनाले हस्ताक्षर गरेका हुन्।
यादवलाई महन्थ ठाकुर पक्षका राजकिशोर यादव र मनीषकुमार सुमनले पनि साथ दिएका छन्। त्यस्तै हाल जेलमा रहेका रेशम चौधरीले पनि आफूहरुलाई नै साथ दिने दाबी यादवले गरेका छन्। उनलाई जेलबाट ल्याएर निर्वाचन आयोगमा सनाखत गराउने तयारी भएको छ।

यादव यसअघि ठाकुर पक्षले केपी शर्मा ओली नेतृत्वको सरकारमा जाँदा मन्त्री पनि भएका थिए। तर अहिले आएर शक्तिहीन भएका ठाकुरलाई यादवले पनि छाडेका हुन्।

अहिले ठाकुर पक्षले कार्यकारिणी समिति र संसदीय दल दुवैमा आफ्नो शक्ति गुमाएको छ। कुनै बेला दुवैतिर बहुमत रहेको ठाकुर पक्ष अहिले कमजोर बनेका छन्। उनीसँग अहिले कार्यकारिणी समितिका १७ देखि १८ र संसदीय दलमा १५ को हाराहारीमा सांसद छन्।

जसपाको आधिकारिकता यादवले पाउने भएपछि ठाकुरलाई दुवैतिर ४० प्रतिशत पुर्‍याउन पनि समस्या भएको छ। राजनीतिक दल विभाजनसम्बन्धी विद्यमान कानुनमा अहिले दल र पार्टी केन्द्र दुवैतिर ४० प्रतिशत पुगे मात्रै पार्टी विभाजन गर्न सकिन्छ।

तर ठाकुर पक्षले दुवैतिर ४० प्रतिशतको पनि हैसियत गुमाएका छन्। ‘हेड काउन्ट’ सकिएपछि प्रमुख निर्वाचन आयुक्त दिनेश थपलिया अध्यक्ष रहेको इजलासले सकेसम्म आजै यादव पक्षलाई आधिकारिकता दिनेछ।

आधिकारिकता पाउने भएपछि यादव पक्ष उत्साहित छ भने ठाकुर पक्ष निराश भएको छ। दुई महिनाअघि सम्मको शक्ति यादव पक्षले खोसेपछि ठाकुर पक्ष तनावमा परेको हो। तत्कालीन राष्ट्रिय जनता पार्टी तराई मधेसमा सक्रिय अन्य पाँच दल मिलेर बनेको थियो।

तत्कालीन राजपाका पनि कयौँ नेताहरु यादव पक्षले तान्न सफल भएको छ। यादव पक्षले लामो समयदेखि कांग्रेस-माओवादी गठबन्धनलाई साथ दिएको थियो। उता ठाकुर पक्षले केपी ओली नेतृत्वलाई साथ दिएको थियो। ओली सत्ताबाट बाहिरिएसँगै ठाकुर पक्ष निरीह भएर पार्टीको आधिकारिकता पनि गुमाउने पक्का भएको छ।

आधिकारिकता पाउने भएपछि यादव उत्साहित र हँसिलो देखिएका छन्। उनले पार्टी आफ्नो कब्जामा आइसकेको बताए। ‘हाम्रो पक्षमा अहिलेसम्म ३४ जना सदस्यले हस्ताक्षर गरिसकेका छन्। अझै रेशम चौधरी पनि आउँदै हुनुहुन्छ’, अध्यक्ष यादवले भने, ‘यो संख्या अझै बढ्न सक्छ। हाम्रो पक्षमा, पार्टी एकताको पक्षमा पूरा बहुमत आएको छ।’